اسماعیل ہنیہ کی ہلاکت میں ملوث نہیں نہ ہی منصوبے سے آگاہ تھے: امریکی وزیرِ خارجہ

امریکی وزیر خارجہ انتونی بلنکن نے حماس کے سیاسی سربراہ اسماعیل ہنیہ پر حملے اور قتل میں امریکہ کے ملوث ہونے کی تردید کرتے ہوئے جنگ بندی کی ضرورت پر زور دیا ہے۔

امریکہ کے وزیرِ خارجہ انتونی بلنکن نے سنگاپور میں ایک تقریب کے دوران کہا ہے کہ حماس کے رہنما اسماعیل ہنیہ کی موت میں امریکہ ملوث نہیں اور نہ ہی اس منصوبے سے آگاہ تھے۔

ان کا کہنا تھا کہ اس بات سے قطع نظر کہ آج کی خبروں کا کیا اثرہو سکتا ہے لیکن جنگ بندی کے لیے دباؤ جاری رکھنا اس وقت شدید اہم ہے۔

ان کا کہنا تھا کہ جنگ بندی یرغمالیوں کے مفاد میں ہے اور انھیں گھر واپس لانا اس وقت سب سے ضروری ہے۔‘

انتونی بلنکن نے مزید کہا کہ فلسطینیوں کا ہر ایک دن شدید اور خوفناک تکلیف میں گزر رہا ہے اور غزہ میں بچے، عورتیں، مرد حماس کی جانب سے کی جانے والی کراس فائر میں پھنس گئے ہیں۔