اسرائیل کے وزیر خارجہ اسرائیل کاٹز کا کہنا ہے کہ ’شمال میں کوئی جنگ بندی نہیں ہو گی۔‘

اسرائیل کے وزیر خارجہ اسرائیل کاٹز کا کہنا ہے کہ ’شمال میں کوئی جنگ بندی نہیں ہو گی۔‘

سماجی رابطے کی ویب سائٹ ایکس پر جاری ایک بیان میں کاٹز کا کہنا ہے کہ اسرائیل حزب اللہ کے خلاف اس وقت تک اپنی پوری طاقت سے لڑتا رہے گا جب تک فتح حاصل نہیں ہو جاتی اور شمالی اسرائیل کے رہائشی بحفاظت اپنے گھروں کو لوٹ نہیں جاتے۔

اس سے قبل اسرائیلی وزیرِاعظم بنیامن نیتن یاہو کے دفتر سے ایک بیان جاری کیا گیا تھا جس میں کہا گیا ہے کہ اسرائیل نے اب تک جنگ بندی کی تجویز کا جواب نہیں دیا ہے۔

امریکہ، برطانیہ، یورپی یونین اور ان کے اتحادیوں کی جانب سے کشیدگی کو کم کرنے کے لیے لبنان میں 21 روزہ عارضی جنگ بندی کی تجویز کے جواب میں نیتن یاہو کے دفتر کا کہنا تھا: ’جنگ بندی سے متعلق خبریں درست نہیں ہیں۔ یہ ایک امریکی-فرانسیسی تجویز ہے جس کا وزیر اعظم نے جواب تک نہیں دیا۔‘

بیان میں کہا گیا ہے کہ شمالی سرحد پر لڑائی میں کمی لانے کے بارے میں مبینہ ہدایت کے بارے میں خبریں بھی حقیقت کے برعکس ہیں۔

’وزیراعظم نے آئی ڈی ایف کو ہدایت کی ہے کہ وہ انھیں پیش کیے گئے منصوبوں کے مطابق پوری طاقت کے ساتھ لڑائی جاری رکھیں۔ نیز، غزہ میں بھی لڑائی اس وقت تک جاری رہے گی جب تک کہ جنگ کے تمام اہداف حاصل نہیں ہو جاتے۔‘