’انتخابات کا اعلان ہوتے ہی شیِخ حسینہ بنگلہ دیش واپس آئیں گی، انھوں نے کسی استعفے پر دستخط نہیں کیے‘: سجیب واجد

بنگلہ دیش کی سابق وزیر اعظم شیخ حسینہ کے بیٹے سجیب واجد نے 90 دن میں انتخابات کرانے کا مطالبہ کرتے ہوئے کہا ہے کہ انتخابات کا اعلان ہوتے ہی ان کی والدہ ملک واپس آئیں گی۔

خبر رساں ادارے روئٹرز کو دیے گئے انٹرویو میں سجیب واجد نے دعویٰ کیا کہ شیخ حسینہ نے بنگلہ دیش چھوڑنے سے قبل کسی استعفے پر دستخط نہیں کیے تھے۔

ان کا کہنا تھا کہ ’میری والدہ نے سرکاری طور پر کسی استعفے پر دستخط نہیں کیے۔ انھیں وقت ہی نہیں ملا۔‘

سجیب واجد نے بی بی سی کو بتایا کہ ’جب عبوری حکومت انتخابات کی تاریخ کا اعلان کرے گی تو وہ یقیناً بنگلہ دیش واپس آ جائیں گی۔‘

یاد رہے شیخ حسینہ 5 اگست کو ملک چھوڑ کر انڈیا چلی گئیں تھیں اور فی الحال وہیں مقیم ہیں۔

روئٹرز کو دیے انٹرویو میں سجیب واجد نے کہا ’شیخ حسینہ استعفیٰ دینے کی منصوبہ بندی کر رہی تھیں۔ لیکن پھر مظاہرین نے ان کی رہائش گاہ کی طرف مارچ شروع کر دیا۔ تب زیادہ وقت نہیں تھا۔ میری ماں کے پاس اپنا بیگ پیک کرنے کا بھی وقت بھی نہیں تھا۔ آئین کے مطابق وہ اب بھی بنگلہ دیش کی وزیر اعظم ہیں۔‘

انھوں نے دعویٰ کیا کہ صدر نے آرمی چیف اور اپوزیشن جماعتوں سے بات چیت کے بعد پارلیمنٹ تحلیل کرنے کا اعلان کیا ہے اور وزیراعظم کے باضابطہ استعفیٰ کے بغیر عبوری حکومت کی تشکیل کو ’مستقبل میں عدالت میں چیلنج‘ کیا جا سکتا ہے۔